ભોળી રે ભરવાડણ હરીને વેચવા ચાલી

ભોળી રે ભરવાડણ હરીને વેચવા ચાલી  (2) 

સોળ સહસ્ત્ર ગોપીનો વહાલો, મટુકી ઘાલી 

ભોળી રે ભરવાડણ......... 

અનાથના નાથ ને વેચે આહીર ની નારી 

શેરીએ - શેરીએ સાદ પાડે, લ્યો કોઈ મોરારી 

ભોળી રે ભરવાડણ.......... 

મટુકી ઉતારી, માંહી મોરલી વાગી 

વ્રજનારી ને સેજે જોતા મૂરછા લાગી 

ભોળી રે ભરવાડણ........... 

ભ્રહ્માદિક ઇન્દ્રાદિક સરખા કૌતક એ પેખે 

ચૌદ લોકના નાથને કોઈ મટુકીમાં દેખે 

ભોળી રે ભરવાડણ............ 

ગોવાલણી ના ભાગ્યે પ્રગટ્યા અંતર જામી 

દાસલડાં લાડ લડાવે નરસેનો સ્વામી 

ભોળી રે ભરવાડણ...........